Wednesday, 17 September 2014

#الحب_خطير


الحب خطير
قالوا عنه كلام كتير 
لكن عمرهم فى يوم ما قلبهم دق

إحساس مات
الزمن عليهم فات
و لو حاولوا فى يوم هيقولهم لأ

و عمره ما بيستنى كلام وأكاذيب
عشان يحدد مين فى العشق يتلاقى
مهما علوا فى أسوار بين كل حبيب 
هنكسر كل حاجز ممكن يتبنا

لكن الشعلة بينا بتأيد
و النار فى قلبك بتزيد
و النار فى قلبى بتزيد
مين هينقذنا؟

لحظات و ينتهى المعاد
و عيونى بتبكى رُماد
و عيونك بتبكى رُماد
و دى تكون نهايتنا

#ضايعين


قدامى فراغ فى صفحات 
من رسايل عمرى ما هكتبها
جربت كتير محاولات 
لكن قلمى مش بيرسمها

حروف ممكن تحكى أساطير و روايات
لكن تتقرى إزاى من غير أبطالها

ليه بيوحشنا الى مش ملكنا
و ليه بنشتاق للى ضيعنا
حبنا خريطة حياتنا من غيرها تايهين إحنا ضايعين
و ليه كتبنا أسامينا عالصخر
رغم إن فى يوم هيمحيها المطر
حبنا خريطة حياتنا من غيرها تايهين إحنا ضايعين

Monday, 15 September 2014

#خلينا_نحلم


فى طريق فى مسار إحنا ماشين
مختلفين و فى نقطة متجمعين
لكن كل خطوة خطوة أقرب ليك

فجأة الشمس فى السما
قالت مع السلامة
سابتنا بين أيديك
سابتنا و مشيت بعيد ... عننا

شوف حالك فين و إجرى عليه
خلينا نحلم
نوصل للنجوم
نلمسها بأيدينا
خلينا نحلم
خلينا نحلم

وقعنا فى بير 
يمكن دا المصير 
لأ دا الطريق الى أنت دلتنا عليه
كانت غلطة يوم ما مشينا فيه
لكن دلوقتى السما ... أقربلنا

شوف حالك فين و إجرى عليه
خلينا نحلم
نوصل للنجوم
نلمسها بأيدينا
خلينا نحلم
خلينا نحلم

Monday, 14 April 2014

#هتستنى_الليلة


ساعات و نكون متفرقين
ثوانى فاضلة تجمعنا
تفكرنا بأحلى عاشقين
و تنسينا ليه إتكسرنا

طفى الأنوار، نزل الستار
ليلتنا هنولعها نار
تفكرنا بأحلى عاشقين
و تنسينا ليه إتكسرنا

أنت هتنستنى الليلة
أنت هتنستنى الليلة
قولى قولى قولى
أنت هتنستنى الليلة؟

أنت هتنستنى الليلة
مرة واحدة بينا أخيرة
ما تقولى قولى قولى
أنت هتنستنى الليلة؟


Tuesday, 21 January 2014

#الحلم


يقولون أن الظلام أحلك قبل الفجر
لكن أول ضوء يثير شرارة الأمل لغد أفضل

لدى هذا الحلم، حيث نلتقى ثانيتاً للمرة الأولى
صباح تتغير فيه الرياح، يعطينا آفاق جديدة

التغيير ممكن إذا غيرنا أنفسنا
لو إقتربنا لتتقاطع مسارتنا مع بعضها البعض
نحن جميعا عجائب هذا العالم

لدى هذا الحلم حيث تتسع قلوبنا
و نبدأ فى فهم
أنه ليس لنا الحق فى قتلك و تعذيبك

لدى هذا الحلم
نستيقظ فى عالم نتخلص فيه من لامبالاتنا
قلوبنا تيقظ الرحمة لتحدد أفعالنا
عالم نكف فيه عن تقييد حرياتهم
التى كانت يوماً ترى الشمس و تشعر بالرياح

لنا هى مجرد تطبيق أحكام, لحظة وجيزة. لكن بالنسبة لهم هى الحياة نفسها

من سجون القيود المهجورة
تُدق أجراس الحرية
تكتب قصيدتها
إستمعوا إلى أصواتها 

Saturday, 21 December 2013

#كفاية_تحبنى


مِستنى، قاعد فى الكرسى القدمانى
يا ترى هيكون مين
أول واحد يمشى

مفيش كلام
مفيش حاجة ممكن تتقال
متقولى ليه حبنا ميمتشى

مش فارقة معايا
كل مرة جرحتنى
و كل مرة كنت عايزك تِبقى جنبى
بس ليه نِبقى مع بعضنا دلوقتى
و إحنا من جوا بُعاد

نفسى أقولك سلام
عمرى ماهقدر
كل مرة بحاول
شوقى بيكبر
بترجاك
كفاية تحبنى
كفاية تحبنى
حبى ليك مش بينتهى

Sunday, 15 December 2013

يوم ما إفتكرت إنى إنسان



النهاردة 15 ديسمبر، كدة بقالى 4 شهور نباتى أو إنسان بجد لو مفهاش زعل يعنى. الفترة الصغيرة دى تقريبا من أسعد أيام حياتى حاسس إنى قدمت لجسمى هدية كبيرة أوى و مخى كمان أصل الموضوع مش أكل بس ولا لبس، قبل ما أتكلم فى الأسباب الى وصلتنى لنقطة التحول دى فى حياتى يوم 15 أغسطس هتكلم عن تفاصيل ملهاش لازمة شوية عن النباتية

كونك شخص نباتى مش معناه إنك أرنب زى لما حد قبل كدة قدملى طبق لحوم مشوية قلتله لأ شكرا قالى طب أجيبلك شجرة ! إسفاف مش كدة ؟ المهم أيوة مينفعش تاكل أى لحوم ولا أسماك و لا حتى أم الخلول ممكن تاكل أى حاجة تخطر على بالك أنا عن نفسى نباتى لبنى يعنى باكل منتجات الألبان عادى مع إنى بحس بذنب و لو فى إله للنباتيه هستغفره بس مش مشكلة هيجى اليوم الى هكون فيه خضرى، خضرى دا الى عايش على خضار و فاكهة بس و ملهوش دعوة بمنتجات الألبان أصلها مش مهمة على فكرة عندك ألف بديل ليها بس أنت تدور شوية

طب أنا كل دا بتكلم عن الأكل بس فى أيه تانى ؟ زى ما بطلت أكل لحوم بطلت ألبس جلود و محدش يقولى طب ما البقرة كدة كدة ماتت، ما هو نفس المنطق بالنسبة للحمة كدة كدة البقرة إتدبحت على النهج الإسلامى (ضحكة ساخرة)  و اللحمة لو مأكلتهاش البقرة مش هتحيا تانى، الفكرة إنك متكنش سبب فى إن كائن حى يموت عشان تشبع رغباتك الحيوانية، مش شتيمة دى بس أنت إنسان و عندك القدرة تقرر و تختار إنت عايش على أرض فيها مليون حاجة ممكن تستخدمها فى اللبس غير الجلود، الصوف، الكاشمير و الفرو عندك المنتجات القطنية مثلا غير الأقمشة الصناعية الى جودتها عالية و بالنسبة للأكل، يعنى عندك كل دى خيرات من الأرض و جى على حتة خروف ولا بقرة تموته و تاكله ! مش منطقية حتى لو فكرت فيها

خلصت كلام عن الأكل و اللبس كل دى بردو مش حاجات مهمة ما أى حد ممكن يعمل كدة و يكون نباتى و خلصنا، هنا بقى نقف هو مش خيار يعنى مش هقلك إن مش بتوحشنى الفراخ البانية مثلا ولا الكوفتة المشوية بس فى حاجة بتحصلك كأن عربية خبطتك صدمة جامدة أوى بتفوقك و تنبهك لأسلوب حياتك و أفكارك الى أنت عايش بيها بتصحيك من الدوشة الى أنت إترميت فيها من صغرك من غير ما يكون ليك خيار من أول ما تدخل المدرسة لحد ما تدخل كلية و كل فترة بيحصل فيها حجات بتنسى فيها نفسك أصلا زى الثانوية العامة عشان تدخل كلية من كليات القمة و فى الأخر تلبس أسود عادى جدا

 فى يوم هتلاقى نفسك غصب عنك بتتغير حتى لو مش عايز و مستقتل على نفسك حياتك و أفكارك الجديدة لحد دلوقتى مش عارف السبب بصراحة عشان أكتبه فى جملة بدل الكلام الكتير دا بس أقرب سبب هو يوم ما تقبلت نفسى، يعنى أيه الكلام دا ؟ أقصد يوم ما إفتكرت إنى إنسان يوم فعلا أقدر أقول إنى إتولدت من جديد أفكارى إتغيرت نظرتى لكل حاجة فى حياتنا بقت مختلفة إفتكر إن أنت دلوقتى مش أنت لو كان عندك الفرصة و إنت صغير تختار تكون مين و ديانتك أيه و تعيش فين و مع مين